Programi Kombëtar i Furnitorëve Shqiptarë

Të krijohet një Program Kombëtar i Furnitorëve, i cili identifikon produktet që Shqipëria importon më shumë dhe i lidh prodhuesit vendas me supermarketet, hotelet, kompanitë e ndërtimit, investitorët e huaj dhe institucionet publike. Për çdo sektor duhet të publikohen nevojat e blerësve për dy ose tre vitet e ardhshme. Bizneset shqiptare që kanë potencial të prodhojnë këto mallra duhet të marrin asistencë për certifikim, standarde cilësie, dizajn produkti, paketim, teknologji dhe rritje të kapacitetit. Tenderët publikë duhet të ndahen në lote më të vogla, kur kjo është e mundur, në mënyrë që ndërmarrjet vendase të mund të konkurrojnë. Përzgjedhja nuk duhet të bazohet vetëm te çmimi më i ulët, por edhe te cilësia, jetëgjatësia, mirëmbajtja dhe ndikimi ekonomik. Investitorët strategjikë duhet të paraqesin një plan për zhvillimin e furnitorëve vendas dhe të organizojnë takime periodike me prodhuesit shqiptarë, pa vendosur kuota që bien ndesh me rregullat e konkurrencës. Qëllimi nuk është të ndalohet importi, por që bizneset shqiptare të ndihmohen të arrijnë standardin e nevojshëm për të zëvendësuar gradualisht një pjesë të tij dhe për t’u futur më pas në zinxhirët rajonalë dhe evropianë të furnizimit. Si Irlanda, përmes Enterprise Ireland, lidh ndërmarrjet vendase me kompanitë shumëkombëshe dhe organizon takime të drejtpërdrejta ndërmjet blerësve dhe furnitorëve potencialë, apo Çekia, që përdor CzechInvest për të ndërtuar ekosisteme vendase furnitorësh rreth industrive strategjike dhe investimeve të huaja.

Përhershme · zgjidhja e propozuar nga autori